07.07.2022

İşğaldan azad olunmuş ərazilərdəki tarix-mədəniyyət abidələri haqqında məlumatların yer aldığı sayt hazırlanıb

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən işğaldan azad olunmuş ərazilərdəki tarix-mədəniyyət abidələri ilə bağlı məlumatların yer aldığı heritage.gov.az saytı hazırlanıb.

İyulun 7-də Beynəlxalq Muğam Mərkəzində saytın təqdimat mərasimi keçirilib.

Sayt haqqında məlumat verən Dövlət Xidmətinin əməkdaşı Fariz Hüseynli bildirib ki, məqsəd işğal dövründə mədəni irs nümunələrimizə qarşı Ermənistan tərəfindən həyata keçirilən vandalizm, mənimsəmə və dağıntı faktlarını internet resurslarında yerləşdirməklə törədilmiş qanunsuz əməllər barədə daha geniş ictimaiyyəti məlumatlandırmaqdan ibarətdir.

Təqdimat mərasimində çıxış edən mədəniyyət naziri Anar Kərimov yeni yaradılan portalın işğaldan azad olunmuş ərazilərimizdə yerləşən tarix-mədəniyyət abidələrinin real mənzərəsinin geniş ictimaiyyətə çatdırılması baxımından əhəmiyyətini vurğulayıb. Bildirib ki, işğaldan azad olunmuş ərazilərdə Mədəniyyət Nazirliyi tərəfindən həyata keçirilən monitorinqlərdən məlum oldu ki, Ermənistan silahlı qüvvələri tərəfindən mədəni irsimizin böyük hissəsi dağıdılıb, vandalizmə və özününküləşdirməyə məruz qoyulub. Ən çox dağıdılan daşınmaz mədəni irs nümunələri içərisində məscidlər, türbələr və digər inanc yerləri xüsusi yer tutur. Yeni sayt işğaldan azad olunmuş ərazilərdəki daşınmaz tarix-mədəniyyət abidələri ilə bağlı portal rolunu oynayacaq.

Dövlət tərəfindən mədəni irsin qorunması istiqamətində görülən işlərin əhəmiyyətini vurğulayan nazir deyib: “Mədəni irs xalqın yaddaş tarixidir və dövlətimiz bu mirasın qorunması üçün böyük səylər göstərir. Ermənistan uzun illər torpaqlarımızı işğal altında saxlasa da, ölçüyəgəlməz vandalizm aktları törətsə də, həmin ərazilərdən mədəni yaddaşımızı silə bilmədi. Onların bu mədəni soyqırımı dalğası XX əsrin əvvəllərində İrəvan və Zəngəzurdan yol alıb”.

44 günlük Vətən müharibəsindən sonra Prezident İlham Əliyevin müvafiq sərəncamı ilə azad olunmuş ərazilərimizdə abidələrin monitorinqinin aparıldığını diqqətə çatdıran Anar Kərimov bildirib ki, monitorinqlər nəticəsində 403 tarixi abidə aşkar edilib və bundan əlavə, 162 yeni abidə (dövlət reyestrinə daxil olmayan) ortaya çıxarılıb. Şuşa abidələrinin kataloqu nəşr edilərək ictimaiyyətə təqdim edilib: “İşğaldan azad olunan digər rayonların da tarixi-mədəni mirasını əhatə edəcək kataloqlar hazırlanacaq. Məqsədimiz bu gün informasiya müharibəsi şəraitində Azərbaycan həqiqətlərini daha sistemli şəkildə dünyaya çatdırmaqdır. Təqdimatı keçirilən sayt da bu mənada mühüm informasiya resursudur”.

Dövlət Xidmətinin rəisi Azad Cəfərli çıxışı zamanı diqqətə çatdırıb ki, heritage.gov.az saytı qurumun açıq informasiya missiyası ilə bağlı prioritetlərinin əsas hissəsini təşkil edir. Qeyd olunub ki, saytda işğaldan azad olunmuş ərazilərdə aparılan tarix-mədəniyyət abidələrinin monitorinqinin nəticələri geniş şəkildə öz əksini tapıb. İlkin olaraq sayta 240 ölkə əhəmiyyətli abidə haqqında məlumat yerləşdirilib. Saytdan tarix-mədəniyyət abidlərinin işğaldan əvvəl və sonrakı vəziyyəti, eləcə də bərpa görüntüləri, arxiv fotoları və cizgiləri, abidələr haqqında müfəssəl məlumat almaq mümkündür. Abidələrin yerləşdiyi məkanlar da müvafiq xəritə üzərində qeyd olunub. İnternet resursu istifadəçilərin rahatlığını təmin etmək baxımından müasir tələblər səviyyəsində, yeni proqram təminatları əsasında hazırlanıb. Sayt “google”un seo (search engine optimization – axtarış motoru optimizasiyası) standartlarına cavab verir. Bu da axtarış sistemlərində əlaqəli olan açar sözlər daxil edilən zaman saytda olan məlumatların ən ön sırada göstərilməsinə imkan yaradır. Məzmun baxımından daha dəqiq, elmi, əsaslandırılmış məlumatlarla zənginləşdirilən internet resursu işğaldan azad olunmuş ərazilərdə yerləşən tarix-mədəniyyət abidləri haqqında məlumatları və bu sahədə olan yeniliklərin də operativ şəkildə ictimaiyyətə çatdırılmasını təmin edəcək.

İctimaiyyəti sayta daxil olaraq öz təkliflərini bildirməyi xahiş edən Azad Cəfərli abidələrin qorunması istiqamətində ictimaiyyətin də rolunun vacibliyini diqqətə çatdırıb.

Sonda mədəniyyət naziri Anar Kərimov və Dövlət Xidmətinin rəisi Azad Cəfərli jurnalistlərin suallarını cavablandırıblar.